జ్యోతిషమూ – లోపలి సంగతులూ - 2
జ్యోతిషం — శాస్త్ర పరిశోధనలు
జ్యోతిషం నిజం కానక్కరలేదనీ, అది పనిచెయ్యడం కేవలం ఆభాస అనీ రుజువు చెయ్యడానికి జాఫ్రీ డీన్ 1987 లో (The Skeptical Inquirer, Vol 11, No. 2, 3. 1986-87) ఒక ప్రయోగం చేశాడు. జ్యోతిషం మీద నమ్మకం కలిగిన 22 మందిని ఎన్నుకున్నాడు. వాళ్ళకి తమ జాతక చక్రమూ, ఆ చక్రంలో ఉన్న బలమైన గ్రహ దృష్టుల ఫలితాలూ రాసి ఇచ్చాడు. ఆ ఫలితాలు సూటిగా, స్పష్టంగా ఉండేలాగా జాగ్రత్త తీసుకున్నాడు. గ్రహదృష్టులని ఎందుకు తీసుకున్నాడంటే, పాశ్చాత్య జ్యోతిషంలో అవి చాలా ప్రధానమైనవి కాబట్టి. అయితే వాళ్ళలో సగంమందికి మాత్రమే వాళ్ళ జన్మ సమయం ప్రకారం వేసిన సరైన జాతకచక్రాన్ని ఇచ్చాడు. మిగతా సగం మందికీ వాళ్ళ అసలు జాతకచక్రానికి పూర్తి విరుద్ధమైన గ్రహస్థితులుగల చక్రాలువేసి వాటి ప్రకారమే ఫలితాలు రాసి ఇచ్చాడు. వాళ్ళను తమకు చెప్పిన ఫలితాలు ఎంతవరకూ సరిపోతున్నాయో నిర్ణయించమన్నాడు.
సరైన జాతకచక్రాల వాళ్ళు తమకు చెప్పిన 261 ఫలితాల్లో 250 ఫలితాలు సరైనవే అన్నారు. మరి తప్పు జాతకచక్రాలు ఇచ్చినవాళ్ళు కూడా తమకు చెప్పిన 214 ఫలితాల్లో 207 ఫలితాలు సరైనవే అన్నారు. అంటే జాతకచక్రం తప్పైనా ఒప్పైనా వాళ్ళకి చెప్పిన ఫలితాలు సరిపోయాయి. ఇదేరకంగా అంతకుముందు 1977 లో మరొక ప్రయోగం చేశాడు. అందులో వ్యక్తులతో ముఖాముఖీగా కాకుండా ఉత్తరాల ద్వారా ఇదేరకంగా 44 మందికి జాతక ఫలితాలు చెప్పి ఎంతవరకు సరిపోతున్నాయో నిర్ణయించమన్నాడు. అందులోకూడా జాతక చక్రం తప్పొప్పులతో సంబంధం లేకుండా 95 శాతం ఫలితాలు సరిపోయాయి.
దీన్నిబట్టి తేలేదేమిటంటే, పరీక్షింపబడినవాళ్ళు జ్యోతిషం మీద నమ్మకం కలిగినవాళ్ళు కాబట్టి వాళ్ళు తమకు తెలియకుండానే తమ నమ్మకాలకి అనుగుణంగా ఆలోచించి ఫలితాలు నిజమనే భావించారు. (దీన్నే డీన్ తమకు తెలియకుండానే Cognitive Dissonance ని తగ్గించుకోవడం అన్న భావనగా వివరించాడు.) కాబట్టి జ్యోతిషం పనిచెయ్యడానికి కారణం ప్రజల్లో ఉన్న నమ్మకమేననీ, జ్యోతిషం పని చేసినట్టు అనిపిస్తుంది మాత్రమేగానీ అది అసలు నిజం కానక్కరలేదు అనీ డీన్ అంటాడు.
నమ్మకాలు - సైన్సు - జ్యోతిషం
ఈ విధంగా జ్యోతిషమంటే యుగళగీతమే అని శాస్త్రీయంగా రుజువు చేసినప్పటికీ చాలామంది జ్యోతిష్కులు అంగీకరించరు. భారతీయ జ్యోతిష్కులని ఎవర్నైనా అడిగితే జాఫ్రీ డీన్ పరీక్షించిన అంశం చాలా హాస్యాస్పదమైనదని అంటారు. ఎందుకంటే పాశ్చాత్య పద్ధతి ప్రకారం గ్రహదృష్టులు లెక్కపెట్టడం భారతీయ సాంప్రదాయంలో లేదు. అలాగే ఆయా గ్రహదృష్టులకి కేవలం వ్యక్తిత్వ లక్షణాల్ని (Personality Traits) మాత్రం ఆపాదించి అవి నిజమో కాదో పరిక్షించడం అసంబద్ధమైనది అని వాళ్ళ అభిప్రాయం. డీన్ పరిక్షించిన ఫలితాలకి ఒక ఉదాహరణ చూడండి:
కుజుడు, యురేనస్ ల సమాగమం: జాతకుడికి అసహనం, స్వతంత్ర బుద్ధీ ఉంటాయి. అన్నింటినీ చెడగొట్టడానికి ముందుంటాడు. ఇటువంటి ఫలితాలని డీన్ చాలా ప్రసిద్ధమైన పాశ్చాత్య జ్యోతిష గ్రంథాల్లోంచి తీసుకున్నప్పటికీ, వాటిని జ్యోతిష్కులెవరూ యథాతథంగా స్వీకరించరు - పాశ్చాత్య జ్యోతిష్కులతో సహా. పుస్తకాలని కేవలం సూచికలు (Guidelines) గా స్వీకరించి ఎవరి అనుభవాన్ని బట్టి వాళ్ళు గ్రహదృష్టులకి ఫలితాలు అన్వయించుకుంటారు. ఇటువంటి వ్యక్తిత్వ లక్షణాల్ని జాతకం ద్వారా నిర్ణయించడం కష్టం. అందులోనూ కేవలం ఒక్క గ్రహదృష్టిని బట్టి నిర్ణయించడం అంటే అది జరిగేపనికాదు. కాబట్టి అసలు జాఫ్రీ డీన్ పరిశోధించింది నిజమైన జ్యోతిషమే కాదు పొమ్మంటారు.
చాలామంది జ్యోతిష్కుల అభిప్రాయాలు ఎలా ఉంటాయి అంటే - జ్యోతిషం పనిచెయ్యకపోవడానికి కారణం చేతకాని జ్యోతిష్కులేగానీ జ్యోతిషం కాదు. జ్యోతిష్కుల్ని కాకుండా జ్యోతిష సూత్రాల్ని శాస్త్రీయంగా పరిశీలిస్తే జ్యోతిషం నిలబడుతుంది. అంతేగాక సైంటిస్టులు జ్యోతిషం పట్ల దురభిప్రాయం కలవారు. వాళ్ళు చేసే పరిశీలనలు పక్షపాతంతో కూడుకుని ఉంటాయి కాబట్టి వాళ్ళు ఎన్ని రుజువులు చూపించినా వాటిల్లో నిజం తక్కువ. మా అనుభవమే మాకు సత్యం. ఇలా భావించే జ్యోతిష్కులే ఎక్కువ. సైన్సు చేసే పరిశోధనల్ని నిజాయితీగా అంగీకరించే జ్యోతిష్కులు ఉంటారని నేను అనుకోను. ఎందుకని? జ్యోతిష్కులే కాదు, మత విషయాల్ని నమ్మేవాళ్ళు కూడా సైంటిస్టులు దేముడు లేడు అనో, లేక మరో మత విశ్వాసం తప్పు అనో చెప్తే వినరు. ఎన్ని రుజువులు చూపించినా తమ నమ్మకాలు తమవి అంటారు. దీన్నిబట్టి మనకి తెలిసేదేమిటంటే జ్యోతిషంకూడా ఒక మతనమ్మకంలాంటిదేనని. అందులో చిక్కుకున్నవాళ్ళు బయటపడడం కష్టం.
జ్యోతిషాన్ని కేవలం ఒక నమ్మకం గానే భావించి వదిలివేయవచ్చు కదా, నమ్మకాలని శాస్త్ర పరిశీలనకి గురి చెయ్యడం ఎందుకు అని ఎవరైనా ప్రశ్నించవచ్చు. మిగతా నమ్మకాల్లా కాకుండా జ్యోతిషానికి ఒక ప్రత్యేకత ఉంది. అదేమిటో చూద్దాం.
తరువాయి సంచికలో రాబోయే అంశాలు:
- నమ్మకాలు - విశేషాలు
- తప్పని నిరూపించగలిగేవే పనికొచ్చే సిద్ధాంతాలు
- జ్యోతిషం నిజంగా పని చేస్తుందని తేలితే సైన్సు అయిపోతుందా?
- జ్యోతిషం పైన జరిగిన కొన్ని పరిశీలనలూ, పరిశోధనలూ
- మైకేల్ గేక్వలిన్ పరిశోధనలు
- Journal of Scientific Exploration (2002, Volume 16, No.1) లో Dr. Frank McGillion పీనియల్ గ్లాండ్ గురించి రాసిన అంశాల గురించిన స్థూలమైన వివరణ.
- జ్యోతిషానికి సంబంధించిన కొన్ని సూక్ష్మాంశాలు
- జ్యోతిషాభిమానులకి కొన్ని సూచనలు.
సుధాకర బాబు అభిప్రాయం:
May 3, 2008 10:49 pm
మీ వ్యాసం నన్ను చాలా శ్రద్ధగా చదివించింది. ఇంత స్పష్టంగా, సరళంగా, విశ్లేషణాత్మకంగా వివరించినందుకు ధన్యవాదాలు. మీ మిగిలిన వ్యాసాల కోసం ఎదురు చూస్తుంటాను.
SRSRV అభిప్రాయం:
May 6, 2008 3:13 pm
it seems one fine day U may tell us that there isn’t any spernatural power (GOD)
K.S.Hareesh Kumar అభిప్రాయం:
May 17, 2008 8:55 am
Good analysis. Predictions are made in three ways. One of them is the Astrology- i.e., predicting future on the basis of planetary positions and their movements from time to time and their effect. The other two are Palmistry and Numerology. We would like the author also to enlighten the readers about Palmistry and whethr it has any connection with astrology.
నాగమురళి అభిప్రాయం:
May 19, 2008 8:39 am
సుధాకర్ గారూ, ధన్యవాదాలు.
హరీశ్ గారూ, ధన్యవాదాలు. న్యూమరాలజీ తోనూ, హస్త సాముద్రికం తోనూ నాకున్న పరిచయం తక్కువ. అందుచేత జ్యోతిషాన్ని విశ్లేషించినంతగా వాటి గురించి విశ్లేషించి వ్రాయలేను. అయితే ఈ వ్యాసంలో నేను చెప్పదలచుకున్న విషయాలు కొన్ని వాటికి కూడా అన్వయించుకోవచ్చు.
ప్రిడిక్షన్సు చెప్పడానికి ఇవి మూడే కాకుండా ఇంకా చాలా ఉన్నాయి అనుకుంటాను. టారట్ కార్డులు, శకునాలు, స్వప్నాలు, స్ఫటికాల్లోకి తొంగి చూడ్డాలు, అంజనం వెయ్యడాలు, వాస్తు గట్రా, గట్రా. ఒక ఆశ్చర్యకరమైన విషయం ఏమిటంటే, వీటిలో మనకి బాగా పరిచయమై,మన సంస్కృతిలో భాగమైనవాటిని మనం తేలిగ్గా నమ్ముతాం. మిగతావి అంత తేలిగ్గా నమ్మం. సంస్కృతి, సామాజిక శాస్త్రం, సైకాలజీ మొదలైన కోణాల్లోంచి చూస్తే వీటి గురించి చాలా ఆసక్తికరమైన విషయాలే తెలుస్తాయి. అయితే ప్రస్తుతానికి అంత విస్తృత పరిధిలో నేను వ్రాయడం లేదు.
విష్ణుభొట్ల లక్ష్మన్న అభిప్రాయం:
May 22, 2008 10:57 am
నాగమురళి గారూ:
చాలా సున్నితమైన విషయం పై చాలా చక్కటి వ్యాసాలను అందిస్తున్నారు.
జాతకం, జోతీష్యం వంటివి చాలా మందికి ఇష్టమైన విషయాలు. వీటిలో భవిష్యత్తు నిర్ణయం ఎలా జరుగుతుంది అన్నది అనుమానాస్పదమైనా, చాలా మందికి తమ భవిష్యత్తు తెలుసుకోవాలనే కూతూహలమే, ఈ నాటికీ ప్రజాదరం పొందుతున్న ఈ విషయాలకు కారణం.
హేతువాద బుద్ధితో ( జాతకం - జోతీష్యం వంటివి నిర్దిష్టమైన శాస్త్రాలు కావని తెలిసినా) ఆలోచించే వ్యక్తులకి కూడా వీటి పై కుతూహలం ఎక్కువే! ఇటువంటి విషయాలను తల్చుకున్నప్పుడల్లా, “మనిషి సహజంగా దుర్బలుడు” అని అనిపిస్తుంది. జీవితంలో వచ్చే కష్టాలు తట్టుకోలేక కొంతమంది భక్తులుగా ఎలా మారతారో, ముందు నమ్మకం లేకపోయినా పరిస్థితుల ప్రోద్బలం వల్ల జాతకం, జోతీష్యం పై నమ్మకం ఏర్పరచుకొన్న వ్యక్తులు నాకు తెలుసు.
ఒక స్వవిషయం.
కవలపిల్లలం అయిన రామన్నా, నేనూ జాతకం ప్రకారం ఇద్దరూ ఒకే రకమైన భవిష్యత్తు ఉన్న వాళ్ళమేనా! లేక, మా ఇద్దరి మధ్య ఉన్న ఐదు నిమషాల తేడా వల్ల (నా కన్నా ఐదు నిమషాలు వయస్సులో పెద్ద కాబట్టి తనను, నేను” అన్న” అని పిలవమంటాడు మా “రామన్న”. నేను రామన్నని అలా ఎప్పుడూ పిలవలా!) ఇద్దరి జాతకాలూ చాలా భిన్నంగా ఉంటాయా? పుట్టటం దాదాపు ఒకే కాలంలో జరిగినా, విభిన్న ప్రాంతాలలో పెరగటం వల్ల వచ్చిన అనుభవాల వల్ల - మా ఇద్దరి భవిష్యత్తులు తేడాగా ఉంటాయా? ఒక పేరు పొందిన జ్యోతిష్కుడు మా ఇద్దరి జాతకాలను ఎలా పరిశీలిస్తాడు? ఫలితాలు ఎలా ఉంటాయి? తెలుసుకోవాలని ఉంటుంది.
తేలిక తెలుగులో, చదవటానికి వీలుగా ఉన్న మీ వ్యాసాలకి ధన్యవాదాలు.
విష్ణుభొట్ల లక్ష్మన్న
నాగమురళి అభిప్రాయం:
May 22, 2008 1:09 pm
లక్ష్మన్న గారూ,
నిజమే, జ్యోతిషం చాలా ఆసక్తికరమైన విషయం. ఈ ఆసక్తికి ప్రధాన కారణం నా ఉద్దేశ్యం ప్రకారం ఇదీ - చాలామంది మనుషులకి తమకి తెలియకుండానే కొంత ‘అధి భౌతిక దృక్పథం’ (Mystical లేక Magical Thinking అనడం సరైనదేమో) ఉంటుంది. నా జీవితంలో పరిస్థితులు ఇలా ఉండడానికి ఏదో పైకి కనిపించని కారణం ఉండి ఉంటుంది (పూర్వ కర్మ లాంటివి). ‘నాకే ఇలా ఎందుకు జరుగుతోంది’ అని మనలో చాలామందిమి ఏదో ఒక సందర్బంలో ప్రశ్నించుకునే ఉంటాము. ఏదో ఒక కారణం వల్లనే మన గతమంతా అలా జరిగింది అనీ, ఏదో ఒక హేతువు ప్రకారమే భవిష్యత్తు కూడా జరుగుతుంది అనీ చాలా ఎక్కువ శాతం మందికి ఒక సహజమైన అభిప్రాయం ఉంటుంది. మన పరిధిలో లేకుండా జరిగే విషయాలని అర్థం చేసుకోడానికి, సర్దిచెప్పుకుని సమాధానపడడానికి ఈ విధమైన దృక్పథం ఒక సహజాతం (instinct) లా పనిచేస్తుంది (చాలా మందికి) అని నా అభిప్రాయం. దాన్ని నేను దుర్బలత్వంగా భావించను - ‘అతి’ లేనంతవరకూ.
జ్యోతిషానికి పునాదులు ఇటువంటి సహజాతాల్లో ఉన్నాయి కాబట్టి అది ఇంకా అనేక సంవత్సరాలపాటు నిలబడి ఉంటుందనే నేను అనుకుంటున్నాను. జ్యోతిషాన్ని నమ్మేవాళ్ళూ, అధ్యయనం చేసేవాళ్ళూ కూడా దాన్ని ఒక ఖచ్చితమైన శాస్త్రంగానే (Deterministic అనే) భావిస్తారు. అయితే అధ్యయనం చేసేవాళ్ళు అది ఖచ్చితంగా పని చెయ్యాలి అని పట్టుబట్టి, లోతుగా పరిశీలించదలచుకుంటే మాత్రం అంతిమంగా నిరాశ పడక తప్పదు. అది నా స్వంత అనుభవం. అయితే అది ఖచ్చితంగా పని చెయ్యకపోయినా, పని చేస్తున్నట్టు ఉభయులకీ అనిపిస్తుంది అనడంలో మాత్రం నాకు సందేహం లేదు. తమవద్దకు వచ్చినవాళ్ళనీ, వాళ్ళ సమస్యల్నీ లోతుగా అర్థం చేసుకుని, పరిష్కారాలు చూపించి, సంతృప్తిపరచగల వ్యక్తిత్వమూ, చాతుర్యమూ, వివేకమూ గలవాళ్ళకి జ్యోతిషం చాలా ఉపయోగకరమైన పనిముట్టు. అయితే వ్యక్తుల ప్రతిభతో ప్రమేయం లేకుండా ఒక పనిముట్టుగానే దాని సామర్థ్యాన్ని పరిశీలించదలచుకున్నవాళ్ళకి మాత్రం అది ప్రస్తుతానికి ఎండమావి లాంటిదే.
ఇక కవలల సంగతి. ఏ జ్యోతిష గ్రంథంలోనైనా సరే దీని గురించి చర్చ జరగకుండా ఉండదు. భూమియొక్క దైనందిన చలనం (Diurnal Motion) ప్రకారం సుమారుగా ప్రతీ నాలుగు నిమిషాలకీ ఒక డిగ్రీ చొప్పున తూర్పున ఉదయించే బిందువు (లగ్నం), అలాగే మిగతా భావాలూ మారుతూ ఉంటాయి. చాలా మంది జ్యోతిష్కుల అభిప్రాయం ప్రకారం ఈ బిందువుల్లో ఎంత సూక్ష్మమైన తేడా వచ్చినా సరే ఫలితాలు మారుతాయి. మరీ ముఖ్యంగా భారతీయ జ్యోతిషంలో రాశి చక్రాన్ని చాలా సూక్ష్మ భాగాలుగా చేసి ఫలితాలు చూసే సాంప్రదాయాలు (నవాంశ, దశాంశ, త్రింశాంశ మొదలైన విభాగాలు) ఉన్నాయి. వాటి ప్రకారం జన్మ సమయంలో ఒక్క నిమిషం తేడా వచ్చినా సరే ఫలితాలు మారిపోతాయిట. అయితే ఆచరణలో మాత్రం అత్యధికశాతం జ్యోతిష్కులు అంత దగ్గరి జాతకాలకి భిన్న ఫలితాలు చెప్పలేరు. అంతేకాదు, చాలా మంది జాతకుల జన్మ సమయాలు కూడా నిమిషంతో సహా ఖచ్చితంగా ఎవరికీ తెలియవు. అందుచేత ఎవరికైనా చెప్పిన ఫలితాలు తప్పిపోతే, ’జన్మ సమయం తప్పై ఉంటుందమ్మా, అది చాలా ఖచ్చితంగా తెలియాలి’ అని జ్యోతిష్కులు తప్పించుకుంటూ ఉంటారు.
కొన్ని పుస్తకాల్లో ఒక్క నిమిషం ఎడంగా పుట్టిన కవలల జాతకాలని ఉదాహరణగా ఇచ్చి, ‘చూశారా ఒక్క నిమిషమే తేడా ఉన్నా, ఫలానా సూక్ష్మాంశం మారిపోవడం వల్ల అసలు ఇద్దరి జీవితాలకీ పొంతనే లేదు!’ అని రాస్తూ ఉంటారు. అయితే ఆ కవలల విషయంలో అన్వయించిన అదే సూక్ష్మాంశం మరొక మామూలు జాతకానికి ఎందుకు అన్వయించరో బోధ పడదు. అంతే కాకుండా అటువంటి సూక్ష్మాంశాలవల్ల నిజంగా మిగతా జాతకాల్లో కూడా ఫలితాలు ఎలా తేడాగా వస్తున్నాయో వివరణలు ఉండవు. వాటికి మాత్రం ఎక్కువ కాలావధిలో మారిపోని అంశాలనే పరిగణనలోకి తీసుకుని ఫలితాలు చెప్పేస్తూ ఉంటారు.
పాశ్చాత్య జ్యోతిషంలో భూమి యొక్క దైనందిన చలనం (Diurnal Motion) ప్రకారం ప్రిడిక్షన్సు చెప్పే పద్ధతి ఒకటి బహుళ ప్రాచుర్యంలో ఉంది. దానిలో జన్మ సమయం ఒక నాలుగు నిమిషాలు తేడా వస్తే, ఫలితం జరగాల్సిన సమయం ఏడాది దాకా మారిపోతుంది. కాబట్టి ఈ పద్ధతిని రివర్సులో ఉపయోగించి జన్మ సమయాన్ని సరిచేస్తూ ఉంటారు. అంటే, మొదట ఒక జాతకాన్ని చూసి, పెళ్ళి జరిగే తేదీని లెక్క వేశాము అనుకోండి. జాతకుడికి పెళ్ళి ఎప్పుడైందో కనుక్కుంటే, మనం కట్టిన తేదీకి సరిగ్గా ఒక ఏడాది తరవాత పెళ్ళి అయిందనుకోండి. అంటే, మన లెక్కలో ఒక డిగ్రీ తేడా వచ్చింది అన్నమాట. భావ బిందువు ఒక డిగ్రీ జరగడానికి పట్టే కాలాన్ని (నాలుగు నిమిషాల్ని) జన్మ సమయానికి కలిపేస్తే, లెక్క సరిపోతుంది. కాబట్టి ఆ విధంగా జన్మ సమయాన్ని సరి చేస్తూ ఉంటారు.
సరదాగా ఒకసారి పరిశీలించి చూసుకోండి - మీకూ, మీ అన్న గారికీ వివాహం, ఉద్యోగం, సంతానం ఇలాంటి కొన్ని ముఖ్యమైన సంఘటనలు ప్రతీవాటికీ సుమారు ఒక ఏడాది తేడా వస్తూ ఉంటే, ఈ పద్ధతి నిజమేనేమో అని మీరూ అనుమానించవచ్చు.
కవలల జీవిత విశేషాలు తెలుసుకుని, వాళ్ళ జాతకాలని సరిపోల్చడమనేది అనేకమంది జ్యోతిష్కులకి చాలా ఆసక్తికరమైన, కూతూహలమైన పని. కాబట్టి మీ ఇద్దరి జన్మ వివరాలూ ఏ జ్యోతిష విద్యార్థికి ఇచ్చినా వాళ్ళు ఎగిరి గంతేస్తారని ఖచ్చితంగా చెప్పగలను.
ఇక మీరు లేవనెత్తిన మరొక ప్రశ్న - విభిన్న ప్రాంతాల్లో పెరగడం వల్ల మా జీవిత విశేషాల్లో తేడాలు వస్తాయా? అని. ఈ ప్రశ్న కవలలకే కాదు, అందరికీ వర్తిస్తుంది. ఒక జ్యోతిషాంశం అన్ని దేశాల, సమాజాల వాళ్ళకీ ఒకే రకంగా పని చేస్తుందా ? దీని గురించి ’జ్యోతిషమూ - కొన్ని సూక్ష్మాంశాలూ’ అన్ని అధ్యాయంలో నేను కొద్దిగా చర్చించదలచుకున్నాను కాబట్టి ఇప్పటికి వదిలేస్తున్నా.
mOhana అభిప్రాయం:
May 23, 2008 6:19 am
వ్యాసం ఆసక్తికరంగా ఉందన్న విషయంలో సందేహం లేదు.
నాకు వచ్చిన సందేహాలు -
(1) ఒక జాతకం ఆడదానిదో, లేక మగవాడిదో అని చెప్పడానికి
వీలవుతుందా?
(2) ఒక జాతకం మనిషిదో లేకపోతే పిల్లి, కుక్కలాటి జంతువుదో
అని చెప్పడానికి సాధ్యమవుతుందా?
ఇక పోతే, భాస్కరాచార్యునివంటి మహా మేధావి తన కూతురు
లీలావతి విధవ అవుతుందని అవగాహన చేసికో లేక పోయారు.
కవలలకు హస్త రేఖలు మున్నగునవి వేరుగా ఉంటాయి.
హస్తరేఖలు వేరైతే భవిష్యత్తు కూడా వేరుగా ఉంటుంది గదా!
విధేయుడు - మోహన
నాగమురళి అభిప్రాయం:
May 23, 2008 8:47 am
మోహన గారూ,
జాతకాల్ని బట్టీ, గ్రహచారాన్ని బట్టీ ఏదైనా సరే తెలుసుకోవడం సాధ్యమే అని జ్యోతిషం అంటుంది. అయితే అది చెప్పే విషయాలు ఏవీ ఇంతవరకూ శాస్త్రీయమైన పరిశీలనకి నిలిచినవి కావు.
నాకు తెలిసినంత వరకు భారతీయ జ్యోతిష గ్రంథాలు కొన్ని జాతకాన్ని బట్టి అది స్త్రీ జాతకమా, పురుష జాతకమా, లేకపోతే ఏ జంతువు జాతకం అన్నది చెప్పవచ్చును అంటాయి. అలాగే పాశ్చాత్య జ్యోతిషంలో ఆధాన చక్రం (జీవుడు గర్భస్తుడైన క్షణంలో గ్రహ స్థితిని తెలియజేసే చక్రం) ద్వారా లింగ నిర్ధారణ చెయ్యవచ్చు అని సిద్ధాంతాలు ఉన్నాయి.
హస్త రేఖలు జాతకంలోని గ్రహస్థితుల్నే ప్రతిబింబిస్తాయి అని చాలామంది జ్యోతిష్కుల నమ్మకం. దీని మీద కూడా కొన్ని పుస్తకాలు ఉన్నాయి అనుకుంటాను.
మీకేమైనా వీటి గురించి రెఫరెన్సులు కావాలంటే, మొదట గూగుల్ లో Pre-natal epoch లేదా Pre-natal horoscope అని వెతికి చూడండి. జాగ్రత్తగా చూస్తే చాలా సమాచారమే దొరుకుతుంది.
ఇవి అన్నీ జ్యోతిషంలో పై తరగతి పాఠాలు (Advanced Topics). ఒకదశలో నేను చాలా ఆసక్తి చూపినా వీటి విశ్వసనీయత చాలా సందేహాస్పదమని క్రమేణా గ్రహించాను.
భాస్కరాచార్యులే కాదు, జ్యోతిషంలో ఎంతటి పండితులైనా సరే నూటికి యాభైశాతాన్ని మించిన సందర్భాల్లో నిజంగా, ఖచ్చితంగా భవిష్యత్తు చెప్పగలరు అంటే నేను నమ్మను. అలా చెప్పగలిగిన వాళ్ళు ఎవరైనా ఈ కాలంలో ఉంటే, ఈ పాటికే మన సైన్సు వేరే విధంగా ఉండి ఉండేది. మనం అందరం జ్యోతిషాన్ని పాఠశాలలో చదువుకుని ఉండేవాళ్ళం.
విష్ణుభొట్ల లక్ష్మన్న అభిప్రాయం:
May 29, 2008 6:20 am
నాగమురళి గారూ:
నా ప్రశ్నలకి సమాధానం ఇచ్చినందుకు థాంక్స్.
మీరు సూచించినట్టు, రామన్నకీ, నాకూ - మా జీవితాల్లో వివాహం, ఉద్యోగం వంటి విషయాల్లో ఒక ఏడాది తేడా అన్నది జరగలేదు. కనీసం ఈ విషయంలో జ్యోతీష్యం ఫలించలేదు. ఒక మనిషి జీవితంలో Nature ప్రభావం గొప్పదా లేక Nurture ప్రభావం గొప్పదా? అన్నది ఎప్పటికీ అంతుతేలని చర్చే! ఈ విషయంలో దాదాపు ఒకే కాలంలో పుట్టిన కవలలపై ఈ ప్రభావం ఎలా ఉంటుంది? రెండు విభిన్న కాలాలలో పుట్టిన, బంధుత్వం లేని ఇద్దరు వ్యక్తులు ఒకే వాతావరణంలో పెరిగితే, ఆ ప్రభావం ఎలా ఉంటుంది?
వ్యక్తిగతంగా నేను జాతకాలని సరదాగా తెలుసుకొని వదిలేస్తాను తప్ప వాటికి అంతకంటే ప్రాముఖ్యం ఇవ్వక్కరలేదనిపిస్తుంది. కాకపోతే, “నా జాతకం ఇలా చెపుతోంది, కాబట్టి నేను ఇలాగే ప్రవర్తించాలి” అన్న Auto Suggestion ని follow అయిన వ్యక్తులు నా దగ్గర కుటుంబాల్లోనే నాకు తెలుసు. జాతకం ప్రకారం జీవితాన్ని మలుచుకొన్న (మలుచుకోదలుచుకొన్న) వ్యక్తుల్ని చూస్తే నాకు భయం.
జాతకం, జ్యోతీష్యం (ఈ మధ్య ప్రజాదరణ పొందుతున్న వాస్తు) వంటి విషయాలపై ఇవ్వవలసినంత ప్రాధాన్యత మాత్రమే ఇస్తే ఫరవాలేదు. లేకపోతే, ఈ విషయాలపై ప్రజల్లోని బలహీనతలని సొమ్ము చేసుకొనేందుకు చాలా మంది గురువులే మనకున్నారు.
నమస్సులతో,
విష్ణుభొట్ల లక్ష్మన్న
నాగమురళి అభిప్రాయం:
May 29, 2008 7:41 am
లక్ష్మన్న గారూ,
Nature-Nurture చర్చ గురించి ఇంగ్లీషులో పాప్యులర్ సైన్సు పుస్తకాలు చాలానే ఉన్నాయి అనుకుంటున్నాను. నేను స్టీవెన్ పింకర్ అభిమానిని. అసలీ నేచర్ నర్చర్ విభజనే ఒక ఆభాస (False Dichotomy) అని ఆయన అంటాడు. మీకు వీలైతే అతను రాసిన `How The Mind Works’, ‘The Blank Slate’ పుస్తకాలు చదవండి. (How The Mind Works లో కొద్ది పేజీలు మాత్రమే దీని గురించి కేటాయించబడింది.) అలాగే జీన్సు కి సంబంధించిన విశేషాలు తెలియజేసే పుస్తకం ఒకటి కొన్నేళ్ళ క్రితం చదివాను (పేరు గుర్తు లేదు ప్రస్తుతం). అందులో కూడా ఇదే భావాన్ని చదవడం జరిగింది. ఇటువంటి పుస్తకాల్లో ఈ విషయమై కవలల గురించిన విశేషాలు, వారిపై జరిగిన పరిశోధనల వివరాలు కూడా చాలా ఉంటాయి.
నమస్కారాలతో,
నాగ మురళి.
Srinivas Bheemani అభిప్రాయం:
June 4, 2008 4:16 am
నాగ మురళీ గారూ ! Kudos !! Your analytical stuff is veritably bangup..await తరువాయి సంచిక…
Regards,
srinivas