నాన్నా తెలుసా
అమ్మో పెద్దైపోతే
అమ్మల్లే నేను కూడ అవుతానేమో!
అమ్మే నాన్నై మరి నా
న్నమ్మయ్యే రోజు ఎపుడు నాన్నా తెలుసా!
మొన్నను నువు రాలేదని
అన్నం తినకుండ రాతిరైనా చూస్తూ
ఉన్నమ్మ చివరికైనా
తిన్నాదోలేదొ నీకు తెలుసా నాన్నా?
నిన్నను నువు తిడుతోంటే
మిన్నక కూచున్న అమ్మ మేడెక్కి, మరే,
కన్నులు తుడుచుకు దిగుతూ
నన్నెత్తుకు నేడిచింది నాన్నా తెలుసా!
అమ్మేదో నిద్దట్లో
కమ్మని కలకన్నదేమొ కలకల నవ్విం
దమ్మను నవ్వుతు చూస్తే
నమ్మకమే కలగలేదు నాన్నా తెలుసా!
అమ్మో పెద్దైపోతే
అమ్మల్లే నేను కూడ అవుతానేమో!
చంద్ర మోహన్ అభిప్రాయం:
November 4, 2008 5:37 am
చాలా బాగున్నాయండీ పద్యాలు! కళ్ళవెంట నీళ్ళు తెప్పించాయి. ఈమాటలో లంకె చూడకపోతే ఇంత మంచి కవిత్వం కంట పడిఉండేది కాదు. ” అమ్మను నవ్వుతు చూస్తే నమ్మకమే కలగలేదు…” మళ్ళీ నీళ్ళు కళ్ళలో.
bollojubaba అభిప్రాయం:
November 4, 2008 7:48 am
చాలా బాగుంది.
ఆర్ధ్రంగా ఉన్నాయి.